Maurice Sendak - Where the Wild Things Are - 1963
Les aultres croissoient en long du corps. Et de ceulx-là sont venuz
les Géans, et par eulx Pantagruel ;
Et le premier fut Chalbroth,
Qui engendra Sarabroth,
Qui engendra Faribroth,
Qui engendra Hurtaly, qui fut beau mangeur de souppes et régna au
temps du déluge,
Qui engendra Nembroth,
Qui engendra Athlas, qui avecques ses espaules garda le ciel de
tumber,
Qui engendra Goliath,
Qui engendra Eryx, lequel fut inventeur du jeu des gobeletz,
Qui engendra Tite,
Qui engendra Eryon,
Qui engendra Polyphème,
Qui engendra Cace,
Qui engendra Etion, lequel premier eut la vérolle pour n'avoir beu
frayz en esté, comme témoigne Bartachim,
Qui engendra Cée,
Qui engendra Typhoe,
Qui engendra Aloe,
Qui engendra Othe,
Qui engendra Ægeon,
Qui engendra Briaré, qui avoit
cent mains,
Qui engendra Porphirio,
Qui engendra Adamastor,
Qui engendra Antée,
Qui engendra Agatho,
Qui engendra Pore, contre lequel
batailla Alexandre le Grand,
Qui engendra Aranthas,
Qui engendra Gabbra, qui premier
inventa de boire d'autant,
Qui engendra Goliath de
Secundille,
Qui engendra Offot, lequel eut
terriblement beau nez à boyre au baril,
Qui engendra Artachées,
Qui engendra Oromedon,
Qui engendra Gemmagog, qui fut
inventeur des souliers à poulaine,
Qui engendra Sisyphe,
Qui engendra les Titanes, dont
nasquit Hercules,
Qui engendra Enay, qui fut très
expert en matière de oster les cérons des mains,
Qui engendra Fierabras, lequel
fut vaincu par Olivier, pair de France, compaignon de Roland,
Qui engendra Morguan, lequel le
premier de ce monde joua aux déz avecques ses bezicles,
Qui engendra Fracassus, duquel a
escript Merlin Coccaie,
Dont nasquit Ferragus,
Qui engendra Happemousche, qui
premier inventa de fumer les langues de beuf à la cheminée, car
auparavant le monde les saloit comme on faict les jambons,
Qui engendra Bolivorax,
Qui engendra Longys,
Qui engendra Gayoffe,
lequel avoit les couillons de peuple et le vit de cormier,
Qui engendra Maschefain,
Qui engendra Bruslefer,
Qui engendra Engolevent,
Qui engendra Galehault,
lequel fut inventeur des flacons,
Qui engendra Mirelangault,
Qui engendra Galaffre,
Qui engendra Falourdin,
Qui engendra Roboastre,
Qui engendra Sortibrant
de Conimbres,
Qui engendra Brushant
de Mommière,
Qui engendra Bruyer,
lequel fut vaincu par Ogier le Dannoys, pair de France,
Qui engendra Mabrun,
Qui engendra Foutasnon,
Qui engendra Hacquelebac,
Qui engendra Vitdegrain,
Qui engendra Grand
Gosier,
Qui engendra Gargantua,
Qui engendra le
noble Pantagruel, mon maistre.
J'entends bien que, lysans ce
passaige, vous faictez en vous-mesme un doubte bien raisonnable et
demandez comment est-il possible que ainsi soit, veu que au temps du
Déluge tout le monde périt, fors Noë et sept personnes avecques
luy dedans l'Arche, au nombre desquelz n'est mis ledict Hurtaly ?
La demande est bien faicte, sans
doubte, et bien apparente ; mais la responce vous contentera, ou
j'ay le sens mal gallefreté. Et, parce que n'estoys de ce temps-là
pour vous en dire à mon
plaisir, je vous allégueray l'autorité des Massoretz, bons
couillaux et beaulx cornemuseurs hébraïcques, lesquels afferment
que véritablement ledict Hurtaly n'estoit dedans l'Arche de Noë ;
aussi n'y eust-il peu entrer, car il estoit trop grand ; mais il
estoit dessus à cheval, jambe de sà, jambe de là, comme sont les
petitz enfans sus les chevaulx de boys et comme le gros Toreau de
Berne, qui feut tué à Marignan, chevauchoyt pour sa monture un gros
canon pevier (c'est une beste de beau et joyeux amble, sans poinct de
faulte). En icelle façon, saulva, après Dieu, ladicte Arche de
périller, car il luy bailloit le bransle avecques les jambes, et du
pied la tournoit où il vouloit, comme on faict du gouvernail d'une
navire. Ceulx qui dedans estoient luy envoyoient vivres par une
cheminée à suffisance, comme gens recongnoissans le bien qu'il
leurs faisoit, et quelquefoys parlementoyent ensemble, comme faisoit
Icaromenippe à Jupiter, selon le rapport de Lucian.
Avé-vous bien le tout entendu ?
Beuvez donc un bon coup sans eaue. Car, si ne le croiez, non foys-je,
fist-elle.
François Rabelais
- 1532
Pantagruel Roy des Dipsodes restitué a son naturel
avec ses faictz et prouesses espoventables
in Œuvres complètes –
1955
Bibliothèque de La Péïade
- Gallimard
